Weerarkii ka dhacay Gaalkacyo oo ay Dad badan ku Dhinteen iyo Al-shabaab oo sheegtay

Ugu yaraan 20-qof ayaa ku dhintay, illaa 30-qof oo kalena way ku dhaawacmeen qaraxyo is-xigay oo saaka ruxay Waqooyiga Degmada Gaalkacyo ee gobolka Mudug oo ay Maamusho Puntland, waxaana mas’uuliyadooda sheegatay Al-shabaab.

Dadweynaha ku Nool Waqooyiga Gaalkacyo ayaa sheegay in ay maqleen laba Qarax oo aad u Cuslaa, kuwaasoo lala beegsaday xarunta Dowladda Hoose ee Puntland ay ku leedahay Magaalada Gaalkacyo.

“Qaraxyadu waxay ahaayeen kuwo culus. Midkii hore waxaa loo adeegsaday gaari waxyaabaha Qarxa laga soo buuxiyay… Daqiiqado kaddibna waxaa isla Goobta lagu qarxiyay gaari kale oo qaraxyo ay ka buuxeen. Waxaana dadka waxyeelladu  kasoo gaartay ka mid ahaa waalakey,” ayay Xaliima Ismaaciil u sheegtay Reuters.

Sidoo kale, Dadkii weerarradan ku dhintay waxaa ku jiray mas’uuliyiin ka mid ahaa kuwa Puntland ee gobolka Mudug iyo Ciidammo, Waxaana mas’uuliyada Qaraxyadan sheegatay Xarakada Al-shabaab.

“Innaga ayaa mas’uul ka ahay weerarradan, waxayna ahaayeen laba qarax oo lagu Fuliyay Gaadiid,” ayuu yiri Sheekh C/casiis Abuu-Muscab oo ah afhayeenka Hawl-gallada ee Al-shabaab oo la hadlay Warbaahinta.

Dhakhtarka Isbitaalka Guud ee Gaalkacyo, Axmed Sugulle ayaa isagana Wakaaladda Wararka Reuters u sheegay in Qaraxyadan ay ku Geeriyoodeen in ka badan 20-ruux, ayna ku Dhaawacmeen 30-ruux oo qaarkood ay qabaan dhaawacyo culus.

Dhanka kale, Kooxda Al-shabaab ayaa waxay tan iyo sanadkii 2010-kii, dagaallo kula jirtay ciidamada Puntland, iyadoo sidoo kalena dhawr bilood ka hor Weerarro toos ahaa ku qaaday deegaanno ku yaalla xeebaha Bari ee Puntland, inkastoo looga adkaaday weerarkaas.

Ugu dambeyn, Xaaladda goobihii ay Qaraxyadu ka dhaceen saakay ee Gaalkacyo ayaa daggan hadda, iyadoo uu ka muuqdo burur xoog leh soo gaaray xarunta la weeraray, waxaana weerarradaan ay kusoo beegmayaa iyadoo Toddobadyadii lasoo dhaafay Magaaladaas laga waday Hawl-gallo ka dhan ah Al-shabaab.

Leave a Reply

Be the First to Comment!

Notify of
avatar
wpDiscuz
error: Content is protected !!